ភ្នំពេញ៖ នាយករដ្ឋមន្រ្តីកម្ពុជា សម្ដេចតេជោ ហ៊ុន សែន បានអំពាវនាវកុំឱ្យមានការប្រើប្រាស់គ្រាប់បែកចង្កោម នៅក្នុងសង្គ្រាមរុស្ស៊ី-អ៊ុយក្រែន ព្រោះអ្នកដែលរងគ្រោះគឺប្រជាពលរដ្ឋឯនោះទេ។

សម្ដេចតេជោ បានសរសេរនៅលើ Channel Telegram របស់សម្ដេចនៅថ្ងៃទី៩ ខែកក្កដា ឆ្នាំ២០២៣ ថា នៅប៉ុន្មានថ្ងៃមកនេះមានការផ្សាយព័ត៌មានយ៉ាងច្រើនថាសហរដ្ឋអាមេរិកនឹងផ្តល់

គ្រាប់បែកចង្កោមឲ្យទៅអ៊ុយក្រែន ដើម្បីប្រយុទ្ធជាមួយកងទ័ពរុស្សុី។ សម្ដេចបានលើកឡើងថាបើសិនជាព័ត៌មាននេះជាព័ត៌មានពិតនោះវានឹងខ្លាចទៅជាឬក៏គ្រោះថ្នាក់សម្រាប់ប្រទេសអ៊ុយក្រែនដ៏យូរអង្វែង។

សម្ដេចតេជោថា៖ «បទពិសោធន៍ឈឺចាប់របស់កម្ពុជាដែលទទួលការទម្លាក់គ្រាប់បែកចង្កោមពីអាមេរិកនាដើមទស្សវត្ស ១៩៧០ មកដល់ពេលនេះជាងកន្លះសតវត្សហើយនៅមិនទាន់រកវិធីបំផ្លាញចោលអស់នៅឡើយ»។

សម្ដេចដឹងថាប្រទេសកម្ពុជាជាប្រទេសតូចហើយទន់ខ្សោយសម្លេងគ្មានទម្ងន់តែដោយក្តីអាណិតប្រជាជនអ៊ុយក្រែនសម្ដេចបានសូមអំពាវនាវប្រធានាធិបតីអាមេរិកដែលជាអ្នកផ្តល់និងប្រធានាធិបតីអ៊ុយក្រែនដែលជាអ្នកទទួលសូមមេត្តាកុំប្រើប្រាស់គ្រាប់បែកចង្កោមក្នុងសង្រ្គាមនេះព្រោះអ្នករងគ្រោះពិតប្រាកដគឺប្រជាជនពិសេសគឺអ៊ុយក្រែនតែម្តង៕